كريم فؤاد: "بحمد ربنا وراضي.. وشوية وقت وهنرجع نحارب من تاني"
عبر كريم فؤاد، نجم النادى الأهلي، عن قبوله تحدى الإصابة بقطع فى الرباط الصليبى وذلك عبر حسابه على فيس بوك. وكتب كريم فؤاد، "كل خسارة دُونَ الجنة، فهي دُون.. اللهم لك الحمد كما ينبغي لجلال وجهك وعظيم سلطانك، الدنيا دار ابتلاء وشقاء ودايمًا الابتلاء بيجي للشخص في الحاجة اللي هو بيحبها ونِفسه فيها وطموحه وسعادته فيها، ودا بيكون إختبار ليك هتعمل ايه في الموقف دا، وأن الاختبار والبلاء دا بيكون ليه أجر كبير ورفع درجات في الجنة وتكفير ذنوب وحاجات كتير عظيمه اوي مقابل اني اصبر على الابتلاء دا".
وأضاف نجم الأهلى، "وأنا كان مكتوبلي إصابة في الرباط الصليبي للمره التانيه، بس عندي احساس تاني خالص مع الإختبار دا، انه انا في نعمة كبيرة اوي وان الحمدلله ربنا رزقني بإختبار سهل وهين أوي مقابل إبتلاءات ناس تانيه اصعب من دا بكتير، وكمان إختبار مش جديد عليا بَعيده للمرة التانية في وقت قصير ف هعرف اتعامل معاه بشكل كويس ويمكن احسن..عشان كدا بحمد ربنا ان الإبتلاء اللي هاخد عليه اجر كبير وعظيم مش بالصعوبة القاسية اللي توجعني وتهدّني".
وأكمل كريم فؤاد، "أنا بحمد ربنا وراضي ومؤمن جدًا إن ربنا بيحبنا نقرب منه بالعبادات اللي منها الصبر والدعاء.. الحمد لله مستعد للاختبار ومتحمس.. شوية وقت وهنرجع نحارب من تاني.. أشوفكم على خير قريب".
