تطبيق إلكتروني تخصص في النصب على الشباب.. ما القصة؟
شقي عمرك هيروح في شربة ميه.. خلي بالك لأحسن يتنصب عليك.. وكله برضاك في الآخر والقانون لا يحمى المغفلين.. تطبيق إلكتروني علي الموبايل هيبيعك اللى وراك واللى قدامك.. ياترى اى حكاية الابلكيشن دا ؟ وازاى بينصب علي المصريين ؟
الحكاية بدأت من حوالى سنتين تقريبا فى نفس التوقيت بالظبط، ظهر تطبيق جديد علي الموبايل إسمه الرمال البيضاء، وإتقال إنه منصة لربح الأموال عبر الإنترنت هتكسبك فلوس كتير وانت قاعد في مكانك.. والناس طبعا تموت في الاكل والمرعي وقلة الصنعة... كله راح رمي فلوسه في الرمال البيضاء علشان يبقي مليونير وهو قاعد على السرير، ولكن في الحقيقة التطبيق دا طلع خدعة جديدة للنصب على المستخدمين.
وساعتها التقارير كشفت أن تطبيق الرمال البيضاء ده هو برنامج بيتم الترويج له،بحجة انك هتكسب الفلوس بسهولة، كل اللى عليك تنفذ بعض المهام البسيطة زى مشاهدة الفيديو أو الاشتراك في القنوات أو الإعجاب بالمنشورات أو متابعة الأشخاص والصفحات على يوتيوب وفيسبوك.
المهم يعنى إن خلال شهرين بس ضم تطبيق “الرمال البيضاء”،حوالى 6 مليون مشترك، وتراوحت قيمة الأموال اللى جمعها مديري التطبيق من اشتراكات المستخدمين ما بين 3 ل5 مليار جنيه، ومع بداية سنة 2022، توقف سحب الأرباح في الموقع، وقام المشرفين على التطبيق بالنصب على المستخدمين وتحويل الملايين دى اللى سرقوها ل عملات رقمية مشفرة وتهريبها للخارج.
المفروض بقى الناس تاخد عبرة من التطبيق ده ولو ظهر مليون تطبيق تانى خلاص لا يمكن ينضموا ليه،لكن اللى حصل غير كده أمال مين يضحك ويتنصب عليه؟ ماهو حلم الدولارات واللامبورجينى لسه بيطارد الشباب اللى عاوز يحول تليفونه دا لمغارة علي بابا اللى هتخليه مليونير من ع السرير.
من كام شهر ظهر تطبيق جديد.. التطبيق الجديد ده مفرقش أوى عن تطبيق الرمال البيضاء،وطريقة عمله هى نفس طريقة عمل تطبيق الرمال البيضاء وبيوفر بردوا مجموعة من الباقات المختلفة، يمكن لمستخدمين التطبيق ربح الأموال من الإنترنت.
الموضوع بيبدأ بمنح المستخدم الجديد للنسخة المجانية 10 جنيهات، و7 باقات مدفوعة أو فى أى بى بتبدأ من 300 جنيه ولحد 30 ألف جنيه.. وإنت واللى معاك بقى،كل ما حجم الباقة بيزيد،وكل ما المهام اللى تتطلب منك تزيد كل ما الربح يزيد طبعا.
ألية عمل التطبيق الجديد مش مختلفة خالص عن تطبيق الرمال البيضاء،لكن الربح على المنصة الجديدة بيكون أسهل،ومفيش تنفيذ كتير للمهام،كل اللى بيطلبه منك هو إنك تحط فلوس بس والربح هيكون يومى،مفيش أسهل من كده فلوس.
وبمجرد التسجيل على التطبيق أو المنصة، هتاخد 20 جنيه مع ربح يومى حوالى 5 جنيه من غير ما تحط أى فلوس،لكن فى حالة الإيداع والإشتراك فى الباقات اللى بتوفرها المنصة هتاخد طبعا فلوس أكتر وهكذا.
الباقات دى بتبدأ من إيداع 100 جنيه لحد 500 جنيه، تمنح باقة الـ 100 جنيه أرباح 25 جنيه في اليوم لمدة 60 يوم بإجمالي أرباح (1500 جنيه)، وتمنح باقة 300 جنيه ربح 66.5 في اليوم لمدة 60 يوما بإجمالي أرباح (3990 جنيه).
أما باقة 500 جنيه، ربح 110 جنيه في اليوم لمدة 60 يوم بإجمالي أرباح (6600 جنيه)
طبعا من وقت إنتشار التطبيق ده وأى تطبيق تانى كتير من الخبراء بيحذروا من خطورة إستخدام التطبيقات دى والمنصات اللى بتنصب وتخدع الناس بالربح الإلكترونى عن طريق إنها بتغريهم بالربح السريع فى البداية وتحويل الأرباح بإنتظام علشان بس يجذبوا الناس ويجيبوا رجليهم، وبعد كده يقفلوا التطبيق وكأن مفيش حاجة حصلت لا فى إثبات إن إتاخد منك فلوس ولا تقدر تطالب بأى فلوس.
خلى بالك اللى بيجى سهل بيروح سهل،وإن متعبتش فى القرش وكسبته من عرق جبينك وحسيت بقيمته لما يروح متلومش غير نفسك،الغريب إن لسه فى ناس بتصدق فى الأرباح الوهمية دى،لسه فى ناس بتجرى على النصاب وتمسك فيه وكأنه هيجبلهم لبن العصفور.
ورغم كل التحذيرات والوقائع اللى بتحصل إلا إن بردوا لسه هوس الفلوس إنها تيجى من الهوا مسيطر على عقول الناس.
