الرئيس السيسى : حياة الأمم مبتتربطش فى يوم وليلة.. واللى هتعمله النهاردة هيستمر لسنين قادمة

قال الرئيس عبدالفتاح السيسى، إن الدولة توقفت لمدة فى 15 عاما منذ 67 وحتى 82، مضيفا: "توقفت كل مظاهر الحياة فيها، لكن متوقفش نموها كبشر ولا مطالبهم كبشر وشعب عاوز يعيش ويتعلم ويسكن 15 سنة.

وأضاف الرئيس السيسى خلال الندوة التثقيفية: "حياة الأمم مبتتربطش فى يوم وليلة.. حياة الأمة تاريخ ومهم قوى نكون فاهمين ده كمواطنين وحتى مسؤولين فى الدولة اللى هتعمله النهاردة هيستمر آثاره الطيبة وغير الطيبة لسنين قادمة".

وتابع الرئيس: "دايما بقول مبعاديش حد وناس تستغرب لما أقصد عداوة فكرة الاستعداء أن ميبقاش فيه عداوات والكون مبنى على التدافع.. وبحط قدام منى 3 نقاط، الفقر والجهل والتخلف"، الفقر يعنى العوز يعنى القلة والضعف والعجز، وفيه ناس كتير قوى فى بلدنا تعرف يعنى إيه فقر ويعمل إيه فى الناس والأديان كلها اتكلمت عليه.. والجهل خطير جدا جدا لانه ممكن يخليك تقدم على إجراءات انت لا تدرك مخاطر إقدامك عليها تؤذيك وتؤذى كل من حولك".

واوضح إن الجيش والشرطة دخلت فى اقتتال مع قوى الشر والتطرف والفكر المتخلف فى أعقاب أحداث 2011 و2013، مشيراً انه فى 2011 و2013 اتكلمنا فى الموضوع ده كتير، وقلت يا ترى الكلام ده ليه تاثير علينا ولا ملوش، الجيش دخل سيناء 2011 فى أعقاب اللى حصل، وتواجد فى المنطقة هو والشرطة فى اقتتال مع قوى الشر والتطرف والفكر المتخلف من ساعتها لحد النهاردة.

شدد الرئيس السيسى على أن مصر دفعت ثمنا باهظا نتيجة هذه الأحداث قائلا: "مصر دفعت تمن كبير قوى، بس عاوز أقولكم وانتبهوا كلكم واحنا بنحارب دى أنا موقفتش الدولة 15 سنة من 67 إلى 82 خليت الدولة تشتغل بأقصى طاقة ممكنة تفتكروا كان ممكن نخلى البلد تستنى الثمانى سنوات أو التسعة، كانت ممكن تستنى؟ اللى زاد فيها عدد السكان تقريبا 25 مليون سنة ليهم مطالب وحاجات فى كل قطاع".

وتابع الرئيس: "أتصور إنه كان هيبقا مبرر طبيعى وقتها أن احنا أن شاء الله فى حرب وكل جهود الدولة وقدراتها هتجند لصالح هذه الحرب، انتوا شايفين كنت أتمنى من الشؤون المعنوية تجيب المواقف اللى كان فيها استشهاد أبنائنا الضباط والجنود.. كانت محاولة يا مصريين لكسركم واللى انت فيه ده هينتهى وهيخلص"..اللى يهمنى فى الوقت ده ليه؟، احنا دفعنا تمن كبير قوى وبندفع مش انا ولا الحكومة كلنا فى الدولة دى ومفتكرش أن احنا يبقا مناسب قوى حد يقول وانا ذنبى ايه؟.. دى بلدنا ولازم نخلى بالنا منها".