أحمد برادة عن حقيقة تعرضه للاغتيال: ”أنا محدش يقدر يهددني”

حل الكابتن و الفنان أحمد برادة بطل الاسكواش العالمي، ضيفا مع الإعلامية ياسمين عز في برنامج "كلام الناس" الذي تم عرضة علي شاشة " mbc مصر"، للحديث عن ذكرياته مع لعبة الإسكواش والعديد من الملفات الشخصية.

وتحدث أحمد برادة، عن نجاحه في مجال الصناعة، وتركه المجال الرياضي ولعبة الاسكواش، بجانب الحديث عن فترة تعرضه لأزمة نفسية قبل دخوله مجال الصناعة، موضحا:" بعد اللي عملته في الاسكواش ماكنتش عايز أنجح تاني، وأقول: انا بشتغل ازاي!!.

وتابع برادة متأثرا والدموع في عينه،:"قصة النجاح جت من أولها بسبب توفيق ربنا ودُعاء أمي، وبعد ما سبت الاسكواش جالي إحباط وماكنتش عايز أنجح، بعد نجاحي في الاسكواش أنا من قلبي مكنتش عايز أنجح وكنت بحارب نفسي.

وتحدث أحمد برادة عن حقيقة تعرضه للاغتيال، منفعلا:" القصة كلها أني كان فيه حرامي بيسرق حاجة من الفيلا وخربشني بسكينة الناس الفت قصص منها دي قصة حب ومنها ده عشان يبطل اسكواش وكل ده كذب".

وأضاف:" أنا بعد الواقعة دي بشهر لعبت اسكواش والموضوع اني اتعورت جامد وهبطل لعب ده كله كلام فاضي لأني لعبت 4 سنين بعد الحادثة دي وكانوا أحلي سنين في حياتي".وعن قصة تعرضه للتهديد حتي لا يحكي تفاصيل الحادثة، قال،:" أنا محدش يقدر يهددني حتي لو كان مين والكلام ده كله مالوش أساس".

وقال أحمد برادة:" فيه إشاعة عني محفورة في الأذهان من 25 سنة والناس بتصدقها وهي غير حقيقة بالمرة".

وأكمل حديثة قائلا:" فيه ناس قالت إني دخلت الاسكواش بعد ما لعبت مع أختي الكبيرة وهزمتني والكلام ده غير صحيح تماما، موضحا:" أنا كنت بتمرن مع داليا عادي جدا".

وتابع:" دي واحدة من اشاعات كثيرة وكذب ردده البعض، وفيه اعلاميين صدقوه وبقت حكاية ثابتة وهي غير صحيحة".

ومن ناحية أخري تحدث برادة عن تجربة التمثيل الوحيدة التي خاضها خلال حواره مع ياسمين عز، مؤكدا، أنه لم يكن ينوي دخول مجال التمثيل ولكن الفنان ليلي علوي هي التي عرضت عليه المشاركة في فيلم حب البنات.

وأوضح،:" التجربة الوحيدة التي خضتها كانت في فيلم حب البنات من خلال صديقتي ليلي علوي وصديقي أحمد عز، ولكن ملقتش نفسي في التمثيل، مضيفة:" بزعل لما الناس تفتكرني من خلال الفيلم مش من خلال الاسكواش".

وعن تعليقات الناس علي أغنية ناسيني وأنا جبنك والتي غناها خلال الفيلم، قال:" مش عارف ازاي الأغنية طلعت حلوة كده وعجبت ناس كتير".