علاء عزت لـ وجه مصر : لو مسؤول هختار مدير عنده خبرات إفريقية مش كولر

"أنا لو المسئول هختار مدير فني عنده خبرات في أفريقيا"، هكذا بدأ الناقد الرياضي علاء عزت حواره مع "وجه مصر" معلقا على رأيه في مدرب الأهلي الجديد السويسري مارسيل كولر، منتقدا إياه بسبب عدم خبرته في إفريقيا.

مبحبش تكون أول تجربة

وقال عزت في تصريحات خاصة لـ "وجه مصر" عن رأيه في كولر: " انا دايما مبحبش أبدا المدير الفني الأجنبي تكون أول تجربة له مع نادي كبير بحجم النادي الاهلي انا مش مؤيدين المدرسة دي، وأنا لو كنت مسئول هختار مدير فني يكون له خبرات بدوري أبطال اقريقيا وله خبرات بالأجواء الأفريقية بشكل كبير جدا ".

سر نجاح موسيماني

وأضاف علاء عزت: "المدرب اللي عنده خبرات إفريقية هو ده اللي بينجح وده كان سر كبير جدا في نجاح موسيماني .. يعني موسيماني لما جه مكنش غريب علي افريقيا ومكنش غريب علي النادي الاهلي فهو لعب مع النادي الاهلي كتير قبل كده وخاض بطولات أفريقية بشكل كبير جدا علشان كده عمل النجاح المذهل دة مع الاهلي" .

مدرب أسطوري في النادي الأهلي

وواصل الناقد الرياضي حديثه عن الجنوب إفريقي قائلا: "موسيماني خد دوري أبطال أفريقيا مرتين متتالين حتي البطولة الثالثة وصل فيها للمباراة النهائية ولو كانت المباراة النهائية دي أٌقيمت في ظروف تانية غير الظروف اللي احنا عيشناها وهي أن الأهلي لعب مع الوداد مباراة واحدة فاصلة في المغرب ده كان أمر صعب جدا ولو مكنش حصل كان زمانا دلوقتي ممكن نكون بنتكلم علي أن موسيماني حقق رقم قياسي أفريقي واتحول لمدرب أسطوري في تاريخ النادي الأهلي وبقي أول مدرب في أفريقيا يفوز بدوري ابطال افريقيا 3 مرات متتالية".

سوء الظروف الأفريقية

وتابع: " أنا كنت أتمني أن النادي الأهلي يجيب مدرب عنده خبرات لان المدربين الأجانب وخاصة الأوربيبن اشتكوا جدا من الظروف الإفريقية، والمدرب الأوروبي طول عمره عايش في أوروبا وشايف الأجواء الأوربية كمان الملاعب كانت فيها المسافات قريبة جدا لكن لما يجي أفريقيا ويشوف بقي الأجواء الإفريقية وإن فيه رحلة طيران بتستغرق 12 ساعة ونعمل ترانزيت في دول افريقية بـ 10 ساعات ونروح ملاعب مفيهاش إضاءة وأجواء حارة جدا وملاعب سيئة جدا اعتقد دا هيسبب صعوبة شديدة جدا للمدرب اللي مش متعود علي كده".

واستطرد: "أنا أول سفرية ليا مع مانويل جوزيه كانت في أنجولا كنت فيها مرافق للنادي الأهلي سنة 2001 .. أنا فاكر كويس جدا أن احنا وصلنا مطار فرنسا كان ترانزيت في فرنسا 6 ساعات فـبمجرد ما عملنا ترانزيت في فرنسا 6 ساعات جوزيه أفتكر أن أحنا كدا وصلنا خلاص ولما قالوله لا احنا لسه في ترانزيت في فرنسا.. وبمجرد ما ركبنا الطيارة والطيار قال ان رحلة طيران من فرنسا لانجولا 11 ساعة الراجل أصيب بحالة من الغضب الشديد جدا وقال ازاي اطير 11 ساعة نزلنا هناك انجولا شاف الملاعب سيئة".

وأردف علاء عزت عن مشواره مع المدرب البرتغالي مانويل جوزيه: " جوزيه كان محظوظ انه يعمل إنجاز مع النادي وياخد دوري أبطال أفريقيا، لكن كان رهان صعب يعني .. انا كنت شايف أن الأفضل له ان النادي الاهلي يجيب مدرب عنده خبرات افريقية يعني عندنا فيه مدربين كان عندهم خبرات وفاشلوا مقابل دة كان عندنا بردو مدربين مكنش عندهم خبرات ونجحوا زي فايلر كدة ".

لغاية ما كولر يحقق إنجاز هيفضل يتقارن بـ فايلر

وعند سؤاله عن المقارنه بين كولر وبين فايلر رد قائلا: " كولر وفايلر نفس اللغة ونفس المدرسة ونفس الأجواء حتي تقريبا نفس معدل السن والاتنين جم في أجواء واحدة ، فايلر جه في بداية موسم وهكذا كولر .. يمكن حتي ملامح الشكل قريبة من بعض ،وأكيد طبعا هيفضل كولر طول الوقت هيتقارن بفايلر لحد ما يحقق انجاز".