عادل إمام هو اللي لقبني.. الحاجة نبيلة تكشف كواليس أغنية ”البامية شوكتني”

تحدث الحاجة نبيلة المعروفة بـ"بلبلة الشرقية" خلال ظهورها مع الفنانة اسعاد يونس في برنامج "صاحبة السعادة" أمس الاتنين، عن كواليس إطلاق هذا اللقب عليها.

وقالت الحاجة نبيلة: "الزعيم عادل إمام هو اللى أطلق عليا اللقب ده، ونفسى أشوفه واشكره بنفسى، وعندي ابن بيغني في الأفراح، والتاني بيعزف كولا".

وكانت الإعلامية إسعاد يونس قد فاجأت جمهور البرنامج من خلال استضافة الحاجة نبيلة المعروف على السوشيال ميديا بأغانيها التي تصدرت التريند في وقت سابق، بسبب صوتها المميز، وموهبتها الغنائية الكبيرة، بأغاني عديدة من الفلكلور منها "البامية شوكتني"، حيث قالت إسعاد يونس أنها بصدد مفاجأة ستغني مع فرقة "بنات مصر" والمايسترو محمد عثمان.

وما إن تم عرض الحلقة بعد الفاصل حتى شدت الحاجة نبيلة الجمهور، بأبرز الأغاني بموهبتها الكبيرة وسط تألق كبير من خلالها مثلما يظهر في أحداث الحلقة.

بغني من زمان مع أمي

وروت الحاجة نبيلة كواليس فيديوهات الغنائية بقولها: "أنا من زمان وأنا بغني مع امي وهي في الغيط، ولحد دلوقتى وأنا بشتغل في الغيطان اليوم بـ50 جنيه، وفى الخط بتاع القطن أغني، مع البامية أغني، وفى يوم بغني لاقيت ابني جه وصورني وأنا بعمل في البامية وبطبخ، وغنيت للبامية والبتنجان".

وأضافت الحاجة نبيلة: "ابني هو صاحب فكرة تصوير الأغنية، وبعد 10 أيام جه قالى افرحي يا اما انتي بقيتي تريند، فافتكرت إنه بيتريق عليا، وبيقولي جالك ترنج من اللى بيتلبس".

وتحدثت الحاجة نبيلة خلال الحلقة عن حكايات من حياتها قبل شهرتها بأغنية "البامية شوكتني" قائلة: "اتعلمت الغنا من أمي، وكنت بشتغل معاها في الغيط، وكنت بسمع منها، ولما كبرت اتجوزت جوزي كان بيحب يعزف على الكمانجة كده، وكنت بروح الحنة مع الستات أغني".

جوزت عيالي من شغل الغيط

وأضافت الحاجة نبيلة التي عرفت بـ"بلبلة الشرقية": "صرفت على ولادي وجوزتهم من شغلى في الغيط، ولما جوزي تعب وما عرفش يشتغل كنت بشتغل وأجيب في اليوم 60 جنيه علشان علاجه"، وعبرت عن حبها له بقولها: "عميت بعد ما مات، كان هو اللى بيعمل كل حاجة، لكن لما تعب 8 سنين حسيت إني عميت".