بطل ”الاختيار” يدعم محمد صبحي: إنسان ومش شيطان

وجه الفنان أحمد رفعت رسالة دعم للنجم الكبير محمد صبحى بعد الهجوم الذي تعرض له من الفنانة عبير صلاح الدين ،الشهيرة بشخصية «عبلة» في مسلسل «يوميات ونيس».

وعلق رفعت الذي قام بالمشاركة مؤخرا في مسلسل «الاختيار 3»- من خلال منشور شاركه عبر حسابه الشخصى عبر موقع التواصل الاجتماعى «فيسبوك» قائلا:"غريبة أنه ما حاربنيش خلال 10 سنين شغل معاه بل كان بيحتفي بيا على الملأ ومن ونيس وأحفاده مشتغلناش مع بعض لكن يظل أفضل كواليس عاصرتها كواليس الأستاذ صبحى اقسم بالله كانت الروح في اللوكيشن عظيمة وأشهد الله أنا كنت بلومه لما لى من علاقة قوية وودودة معاه كنت بلومه لانشغاله بكل تفاصيل الكل ونسيانه لنفسه".

وتابع رفعت: «محمد صبحى نختلف على بعض التصريحات أو المواقف العامة طبعا لكنه يظل مدرسة فنية كبيرة جدا وعلامة في تاريخ المسرح العربى نشرح شوية بيقولوا إنه كان يشترط أن اللى يشتغل معاه يفضى له وميشتغلش مسلسلات تانية أنا كنت بشتغل مسلسلين معاه عزت أبوعوف الله يرحمه كان أكتر واحد بيشتغل أيامها ولما كان بيتاخر ساعة أو حاجه يعنفه بهزار وتقلب ضحك ويحضنوا بعض بيقولوا إنه مبيحبش حد يظهر عليه أو جنبه تلاتة بالله العظيم كان بيقول الافيهات للكل ولما حد يقوله أفيه لو لقاه حلو يعتمده وكانت المشاهد بتبقى مفتوحة لأى افيهات جديدة طول الوقت بكل حب وود وتسابق للأفضل أخيرا صبحى إنسان لا هو ملاك وأكيد مش شيطان".

عبير صلاح الدين تشن هجوم على محمد صبحي

وكانت عبير صلاح الدين، قد شنت هجوم علي الفنان محمد صبحى في لقائها ببرنامج «كلام الناس» مع الإعلامية ياسمين عز قائلة: «محمد صبحى حاربنى لأنى قلت لا، هو حارب نجوم غيرى كتير، ولو لاحظنا هتلاقي إن الناس اتغيرت في مسلسل عائلة ونيس من أول جزء لحد الجزء السابع، ودا لأن اللي بيقول لا أو بيزعل محمد صبحي بيموته في الموسم اللى بعده وبيسفره».

وقالت عبير صلاح الدين :الحقيقة بتزعل لو قلت الحقيقة ناس كتير هتزعل وهتهاجم جامد جدا، محدش هيصدقني المصداقية دايما لما تقارني يقولك يا عم هي كانت مين ده هو اللي عملها، وسمعت ده كتير بس ربنا شاهد وعارف«، وتابعت»أول مرة أقول الكلام ده في برنامج، لما عملنا الجزء السادس، كان بعد 10 سنين رجعنا بعد وفاة سعاد نصر والناس دي كبرت وفيه أحفاد، كان حلو وفيه نجوم كتير جدا عمل رد فعل حلو وكويس، جينا الجزء السابع من وجهة نظري مكانش ينفع نكمله كنا فوق بالسادس وكان لازم نسيب واحنا فوق مننزلش، والسابع كان مط وتطويل وحصل فيه خلافات كتير مش أنا بس مع الكاست كله.

وأضافت: «توقف التصوير في 2009 لمدة 6 أشهر في هذه المدة صورنا جزء وفيه ناس حصل خلاف ما بينهم، وبدون ذكر أسماء اضطرينا نعيد التصوير تاني ببلاش، وفي نفس الوقت مش هتلحقي تعرضى في 2009 في الوقت ده كنت بكتب سيت كوم، بستعد عشان أدخل ومينفعش أدخل وأنا بشتغل المسلسل ودي قوانين محمد صبحي، كملنا الجزء السابع واحنا في شد وجذب.

وواصلت: وأنا قاعدة في التصوير لقيت الأستاذ بيقولي انتي عايزة تعملي مسلسل افتكرته بيهزر، قلتله اه بعمل حاجة، قال هي عبلة وهتفضل عبلة، وأنا كنت بعمل حاجة تانية خالص بكتب حاجة تانية، بعدها بدأت اطلع صامت وعبدالله بيتكلم وأنا واقفة ساكتة.

واختتمت قائلة:«حسيت بظلم، حاولت أعمل مسلسل إذاعي حاجة لرمضان أنا وعبدالله مشرف سجلنا حلقة ومتعملش، عبدالله قالي مش هكمل وكنت صورت التتر على السوشيال ميديا، فجأة الأمور بتتقفل»، مشددة على أنها لم تندم ولم تذهب للاعتذار للفنان محمد صبحي، قائلة: «اعتذر عن ايه، مغلطتش، أنا مش آلة بدوس على زراير، لازم يكون فيه إحساس .

الجدير بالذكر أن الجزء الأول من مسلسل «يوميات ونيس» تم عرضه في 1994، واستمر في خمسة أجزاء متتالية حتى عام 1998، وتوقف العمل قبل أن يعود في جزء سادس بعنوان «يوميات ونيس وأحفاده» عام 2009، وفي 2010 الجزء السابع «ونيس وأيامه»، وكان الجزء الثامن هو آخر أجزاء العمل وعُرض في 2013.