صفية العمري: أعاني من الوحدة.. والمنتجين مبقوش يعرفوني

أعربت الفنانة صفية العمري، عن استيائها الشديد من تجاهل المنتجين والمخرجين لها، مشيرة إلى أنها ما زال لديها طموح وتريد تقديم العديد من الأدوار.

جاء ذلك خلال لقائها في برنامج "ليالي Ten" الذي تقدمة الإعلامية بوسي شلبي عبر قناة Ten TV .

ووجهت صفية العمري، رسالة للمنتجين قائلة: أنا معرفش معظم المنتجين دلوقتي ويمكن هما مبقوش يعرفوني خلاص، وما زال عندي عطاء ولسه بقدر أشتغل، وعندي طموح ولكن قاهرنا ليه؟

وتابعت الفنانة القديرة: "يعني فيه حاجات بحلم إني أعملها في شخصيات وأدوار، المرأة المصرية ليها وجود هايل، ليه ميكتبوش لنجاح المرأة المصرية؟".

وأضافت: مبقاش عندي أمل، لأن مش دول المنتجين بتوع زمان اللي بيعرفوا يختاروا الفنان المناسب للشخصية، أنا مش عايزة أظلم حد، ولكن إحنا مبقيناش مهمين بالنسبة لهم وملناش وجود.

أعاني الوحدة

لفتت الفنانة صفاء العمري إلى أنها تُعاني من الوحدة بسبب تواجد أبنائها في الولايات المتحدة الأمريكية، وقلة عملها خلال الفترة الحالية قائلة: أنا بعاني من الوحدة، وولادي ربنا يخليهم ليا بحاول قدر الإمكان إني أسافر عندهم في أمريكا، لكن فيه وحدة طبعًا والشغل كان بيلهيني.

يجب حصول الفنانيين على مقابل

وطالبت الفنانة صفية العمري، بحصول الفنانين على مقابل مادي، نظير عرض أعمالهم على القنوات التلفزيونية، قائلة: إحنا الفنانيين اللي أعمالنا بتتذاع كل يوم المفروض يبقى لينا عائد والحقوق بتاعتنا ناخدها لكن محدش مهتم، العالم كله بيدفع للفنان، المنتجين مش هتدفع من جيوبها، لكن القنوات هي اللي مستفيدة، والفنان مش مستفيد بحاجة، للأسف النهاردة فيه فنانين كتير مرضى، هل ينفع إن الدولة هي اللي تعالج الفنان؟ أنا غضبانة جدًا.

مسلسل ليالي الحلمية

ومن ناحية اخري، تحدثت صفية العمري تحدثت عن كواليس تصوير مسلسل "ليالي الحلمية" ودورها المميز "نازك السلحدار".

وتابعت صفية العمري: "نازك السلحدار دي شخصيتي أنا، يعني أنا طول عمري كده من وأنا صغيرة ودي شخصيتي، نازك ماضفتش ليا حاجة، بالعكس أنا اللي ضفت ليها من روحي ومن شخصيتي أنا".

مسلسل الأيام

وخلال اللقاء، تذكرت صفية العمري مسلسل "الأيام" مع احمد زكي، قائلة: في بداياتي، حتى مفكرتش وقتها مين اللي هيلبسنا، زي ما موجود النهاردة الفنان بيدخل معاه 7 وراه مبيجبش حتى المنديل من بيته، إحنا مكناش بناخد فلوس خالص، يعني مبالغ ضئيلة جدًا، وكنا بنصرف على مظهرنا، يعني لبس مسلسل (هوانم جاردن سيتي) كله و(ليالي الحلمية) أنا جبته على حسابي، تمن البرنيطة بس بسعر حلقة، مكناش بنفكر هنقبض كام لأنه كان الفن بالنسبة لنا هو الحياة

أخر أعمال صفية العمري

وكان فيلم "كان لك معايا"، آخر أعمال صفية العمري ، وتدور أحداث الفيلم فى إطار اجتماعى رومانسى، وهو من بطولة محمود قابيل، إضافة إلى كل من الشباب منة جلال وأسامة أسعد.